每日一打開email,就係一封又一封嘅垃圾郵件。好多商家都嘗試以各種宣傳方式令你接觸佢哋嘅產品同服務,希望有一日你會決定購買。但係,作為顧客嘅我哋應該都好清楚,其實收到咁多直銷並唔會令到我哋有購買嘅意慾,所以先會將呢啲宣傳嘅郵件叫做「垃圾郵件」咋嘛。

即使你send幾多email出去都好,都係只有極少部分可以成功觸及目標群組,呢類傳統嘅宣傳手法成效低,可以話係完全靠彩數。不過,辦法總比困難多,發現呢個問題之後,喺2006年,一間營銷科技公司Hubspot就諗到「集客式行銷」(Inbound Marketing)呢個概念啦!

一般傳統行銷手法通常會被歸納為Outbound Marketing,簡單黎講,就係有殺錯、冇放過,商家會盲目推送訊息比潛在顧客(Leads)以達到開單嘅目標,呢類策略都有個形象化啲嘅名,叫推動策略(Push Strategy)。反之,Inbound Marketing就係有計畫過嘅行銷,商家會特別為自己目標群組而設計宣傳品,從而吸引顧客主動踏出第一步,之後根據對顧客嘅了解改善自身產品同服務,令顧客願意喺咁多同行中選擇自己,再次甚至多次回購,呢啲策略呢就正正同推動策略相反,又叫拉引策略(Pull Strategy)。

咁想顧客自動搵上門,究竟應該點開始呢?唔洗擔心,等小編為大家介紹一啲基本嘅技巧。

搜尋引擎最佳化(Search Engine Optimization/ SEO)

要解釋SEO,首先我哋要知道咩係搜尋引擎(Search Engine)。搜尋引擎係一種幫你梳理全球資訊網(World Wide Web)以幫你搜尋有關網站嘅軟件,我哋日日上網用嘅Google、Yahoo同Bing就係最廣為人知嘅例子。

假使你依家擁有一個新網站,搜尋引擎會先檢索(Crawl)網站嘅基本資料,比如網站內容、編碼等等,通常呢啲搜尋引擎都擁有自己嘅索引(Index),搜尋引擎跟住就會分析並紀錄網站嘅關鍵字、反向連結(Backlink)嘅數量等等,呢啲因素足以影響網站的排名、流量同曝光率。

當有人於搜尋引擎輸入任何關鍵字,搜尋引擎就會為佢列出最相關嘅網站,呢啲我哋稱之為有機或者自然搜尋(Organic Search)。SEO做得越出色,就會喺搜尋引擎到有越高嘅排名,咁就會有越多嘅有機搜尋同埋網站流量啦。

知道SEO嘅重要性之後,我哋依家黎簡單講解下點樣可以做好SEO。最直接嘅網頁站內(On-Page)嘅方法當然就係我哋上面提及嘅關鍵字,試諗下,十位顧客搜尋你嘅商品同服務嘅時候,可能輸入左十個唔同嘅關鍵字,當你構思網站內容嘅時候,記得要盡量加入大量有關嘅關鍵字,先可以獲得更多嘅有機搜尋架!

網頁外部(Off-Page)方面,你嘅網站有越多反向連結,排名就會越高。同樣道理,如果你嘅網站越多瀏覽數量,搜尋引擎就會比更高嘅評分你,咁網站都會有更高嘅有機搜尋排名架。

另外,其實都有技術層面上做SEO嘅方法,就好似網站結構、數據管理、安全性、反應性等等都會有影響,不過呢啲就要留翻比IT部嘅同事處理啦。

  • 搜尋引擎營銷(Search Engine Marketing/ SEM)

做行銷嘅我哋都係講翻SEM啦。SEM係以廣告嘅形式喺搜尋引擎出現,落廣告嘅時候你可以自訂目標群組、網頁簡介、登陸頁面(Landing Page)等等,其中最緊要嘅係廣告嘅關鍵字,看似簡單但係都係一門學問黎架,就用Google Ads做例子,剩係關鍵字其實都有好多設定,就好似配對選項(Matching Options)咁都有好多種,想知更多嘅話下次小編再同大家解釋。

咁講到明係廣告就當然係有收費啦,通常SEM收費係以每一個點擊作為單位,不過要留意嘅係其實唔同嘅關鍵字係會有唔同嘅收費,比較常用嘅字眼就會有更高昂嘅費用。

唔知你睇到呢到會唔會有個疑問:既然SEM算係廣告,咁點解我哋會話佢係Inbound Marketing嘅一種呢?原因好簡單,因為SEM同SEO一樣都係用戶主動上網搜尋資訊嘅時候,由搜尋引擎推薦比用戶嘅有關網站,呢個廣告切合用戶需要,假使呢個用戶真係對產品服務有興趣,就會主動聯繫商戶,所以商家其實係一個被動嘅角色。

咁點解有SEO我哋仲需要做SEM呢?首先,就係你可以擁有更大嘅話事權,幾時開始同完結一個廣告活動、主要針對邊一類受眾、喺廣告上加入咩野額外資訊都係由你決定。另外,SEM比起SEO可以喺更短時間內獲得更多數據,特別係流量少嘅網站,所以都非常適合要做A/B Testing嘅行銷人員。

  • 內容營銷(Content Marketing)

內容營銷係近排好流行嘅行銷策略。唔知你有冇追蹤左某啲品牌嘅社交媒體、睇佢哋blog嘅習慣呢?其實呢啲都可能係品牌嘅內容營銷策略黎架。

只要上載同品牌有關、有趣、具資訊性嘅內容,將自己打造成為一個領域專家,同時有效提升你嘅品牌知名度,喺顧客心目中有一個專業得黎又親民嘅形象。對你嘅產品或服務有興趣嘅顧客自然會被你嘅知識所吸引,對你嘅信任亦會更深。

所以,內容營銷可以喺唔會騷擾任何潛在顧客嘅情況底下吸引顧客主動上門搵你,可以話係雙贏。就好似你依家留意緊我哋Juicyapp嘅Blog咁呀,希望你作為讀者都會認同我哋係營銷科技嘅專家,你唔會因為不斷見到我哋呢啲文章嘅廣告而感到反感,假設你有日考慮推出一啲會員系統、忠誠計畫,或者你都會諗起我哋咁。

唔賣廣告啦,我哋講翻內容營銷先。其實內容營銷嘅內容都未必一定要係長篇大論嘅文章架,可以係易入口嘅卡通漫畫、或者一啲片段分享等等,只要同你嘅品牌有關係就得架啦,真係有無限嘅可能性!多啲同你嘅潛在顧客交流,話唔定佢哋會成為你將來嘅顧客架。

  • 社交媒體營銷(Social Media Marketing)

不得不提嘅係社交媒體上嘅營銷,好多品牌漸漸都喺Facebook、Instagram、Twitter呢啲社交平台上開設自己嘅官方帳號,除左可以同現有嘅潛在客戶互動交流,同時能夠加強品牌知名度,從而吸引更多潛在客戶,甚至增加商戶網站流量。

社交媒體營銷可以配合內容營銷發揮最大作用,又好似我哋為例,睇翻數據我哋可以知道唔少瀏覽我哋Blog網址嘅流量都係從我哋嘅社交平台過黎嘅,內容營銷同社交媒體營銷係相輔相成架。

今時今日,網絡上資訊氾濫。Inbound Marketing係一個創新、可以幫你突圍而出嘅營銷手法,多得Hubspot,我哋嘅營銷策略先可以獲得更高投資回報率咋。希望你睇完呢篇blog之後對Inbound Marketing有更深入嘅理解啦。