相信大家對Youtube都唔陌生,每日應該都花唔少時間喺到睇Youtube片啦!
Youtube平台入面嘅影片類型多元化
有休閒嘅Vlog、資訊性嘅教學影片、遊戲影片、唔同類型嘅開箱或者評測影片等…
就連我哋Juicyapp都開咗個Youtube Channel,希望可以分享更多科技資訊比大家
如果想睇多啲我哋提供嘅資訊記得㩒Subscribe喎!

2015年,Youtube公布每分鐘上傳到平台嘅影片總長度為500小時之多
就算唔食飯唔沖涼唔瞓教都好,連100分之1嘅片都睇唔晒啊!

2017年Google亦宣布,全球用戶每日透過Youtube睇片嘅時間已經突破咗10億小時!
10億小時係幾多?1,000,000,000小時 即係有成11萬年咁多…
由此可見,Youtube係有幾大吸引力同影響力!

大家熟悉嘅Youtube其實係喺2005年2月
由三名前Paypal員工陳士駿、Chad Hurley同Jawed Karim創辦
網站口號係「Broadcast Yourself」希望大家上傳影片,可以表現自己!
Chad-Hurley-ve-Steve-Chen2
^Youtube平台三位創辦人 (左起: Chad Hurley、陳士駿、Jawed Karim)

最初設計目的係比單身人士上傳影片簡單介紹自己,希望可以達到約會交友嘅目的
為咗吸引用戶,只要有女性上傳自己嘅影片到Youtube,就可以得到20美元作獎勵

可惜,網站成立咗五日,竟然連一個用戶註冊都冇,令約會交友依個方向需要中止
之後,為咗轉型,Youtube開放咗對影片種類嘅限制,於是就成就咗今時今日多元化嘅Youtube啦!

重新出發後,創辦人之一 Jawed 喺同年4月上傳咗一段只有20秒嘅片「Me at the zoo」
短片講述自己喺動物園入面見到好多個大象 個鼻好長好長好長
成為咗依個Youtube平台上嘅第一條影片,Jawed亦成為咗第一位Youtuber!
雖然依段短片唔係話特別有趣,但因為佢嘅代表性
令到佢嘅累積觀看人數已經超過5000萬,留言亦接近70萬,真係估唔到啊!

 睇完Youtube第一條片之後,想唔想知道自Youtube成立自今,最多觀看次數影片同埋最多like嘅影片係邊個呢?

Youtube平台上影片數量多不勝數,每日有數以萬計嘅影片上傳
而最最最最最受歡迎嘅,就係前排好hit嘅西班牙歌Despacito啦!
截至2018年7月28日,累積觀看次數已經超過咗53億,亦收到超過2900萬個like
成為Youtube平台上最多觀看次數影片同埋最多like嘅影片!
亦同時成為最短時間之內達到20億、30億、40億、同50億觀看次數嘅影片!
個個就算唔識西班牙文都識唱 地白絲多…喱多…比你重溫下啦

音樂嘅威力龐大,無論最多like定最多dislike竟然都係音樂MV?

同樣截至2018年7月28日
最多dislike嘅影片竟然係好多年前風靡一時嘅Justin Bieber – Baby MV
樹大招風,
依個MV拎到嘅Like同Dislike數目可以話係一半一半
分別係947萬個Like 同928萬個Dislike 唔知你哋又Like唔Like?

一條高質片係唔夠嘅,要多人訂閱頻道仲有好多因素要諗㗎
講完影片,就講下Youtube頻道啦!

2009年,由Fred Figglehorn所建立嘅頻道「FRED」訂閱人數超過咗100萬
成為Youtube平台上第一位取得100萬訂閱者的頻道!
佢嘅短片係以搞笑低能為主,以低能白痴嘅聲線,加上誇張嘅表情做一啲白痴無厘頭嘅事
例如影住自己拎鸚鵡嚟咬自己啲牙,仲要慢鏡重播 …
如果大家得閒無聊都可以睇以睇下佢個頻道㗎
不過佢對上一次更新已經係三年前,唯有睇住之前啲片先啦…

而截至目前,最多人訂閱嘅頻道就係「PewDiePie」啦,有6466萬之多
佢嘅頻度主要係以拍攝遊戲影片同埋對各種事務嘅評論同反應影片為主
依家平均每日都會出片 PewDiePie上傳嘅總影片數量達到3500條咁多
大家真係可以有排睇啦!

Youtube成立到依家13年,近幾年普及率同使用率突然暴增
無論喺咩國家、係男定女,大大小小都紛紛成為Youtuber
影片類型多唔不勝數,令Youtube成為咗一個影片多元化嘅平台
依家年輕人已經睇Youtube多過睇電視添
唔知,遲啲Youtube又會點樣發展呢?

Credit: Youtube